Grondslagfase

By Laerskool Mariepskop, of soos ons dit noem, ons #LEKKERPLEK, glo ons dat leer nie net in die kop gebeur nie – maar ook in die leerders se harte en met hulle hande. Hier is ons heeldag op ‘n ontdekkingsreis. Dit gebeur in die modder, onder bome, in geselsies en in drome.

In ons Grondslagfase fokus ons op heelkind-ontwikkeling deur leer wat konkreet, kreatief en vol pret is. Ons kinders leer deur te DOEN – met speletjies, egte leerervarings, stories, stasie-rotasie aktiwiteite en breinpret.

  • Ons glo in kaalvoet-leer – leer met jou lyf, jou sintuie en jou hele wese.
  • Ons bou selfvertroue deur kreatiewe take, kritiese denke en konkrete leerervarings.
  • Ons leer lees, skryf en somme maak – maar ook hoe om vrae te vra, probleme op te los en om krities te dink oor die wêreld.

Ons volg die kurrikulum met passie, maar voeg die #LEKKERPLEK met 'n skop by:

  1. Klankontwikkeling deur klankspel en liedjies.
  2. Wiskunde deur praktiese en konkrete ontdekking.
  3. Leeslesse wat liefde vir boeke aanwakker.
  4. Kritiese denke wat koppe laat kraak en kreatiwiteit laat bruis.
  5. Lewensvaardighede wat kinders leer om hul emosies, woorde en wêreld te verstaan.

Elke kind is uniek, en daarom pas ons ons benadering aan om hulle op hul vlak te bereik.

Dis hier waar voete vastrapplek kry en vlerke begin groei.